У чацьвер, 5 лістапада, каля 20 пасажырскіх авіярэйсаў у Эўропе атрымалі паведамленьні пра нібыта закладзеныя бомбы. Некалькі самалётаў перанакіравалі ў іншыя аэрапорты, а для суправаджэньня часткі рэйсаў паднялі вайсковыя зьнішчальнікі. Паводле AFP і іншых СМІ, выбуховых прыладаў падчас праверак не знайшлі.
Самалёт Aer Lingus, які ляцеў з Дубліна ў Рым, пасьля пагрозы прызямліўся на вайсковай авіябазе Эўрэ на поўначы Францыі. Паводле Reuters са спасылкай на офіс францускага прэм’ер-міністра, на борце знаходзіліся 151 пасажыр і шэсьць членаў экіпажу. Усіх перавялі ў бясьпечнае месца, да праверкі самалёта прыцягнулі спэцыялістаў па абясшкоджваньні выбухоўкі.
Рэйс Finnair з Хэльсынкі ў Рым суправаджалі італьянскія вайсковыя самалёты. Прадстаўніца авіякампаніі Стыіна Туўнанэн пацьвердзіла AFP, што пасьля прызямленьня нічога падазронага не знайшлі. Іншы рэйс з Хэльсынкі ў Вену, які выконваўся для Finnair, таксама атрымаў пагрозу.
У Баўгарыі вайсковыя самалёты суправаджалі тры рэйсы Ryanair, якія накіроўваліся ў Сафію. Адзін зь іх, з лёнданскага аэрапорту Станстэд, перанакіравалі ў Плоўдзіў. Пасьля праверак выбухоўкі не знайшлі. Пагрозы таксама закранулі рэйсы Wizz Air і іншых авіякампаніяў. Чэская паліцыя правярала паведамленьні пра пагрозы некалькім самалётам, якія ляцелі ў Прагу.
Падобныя паведамленьні паступалі і раней на гэтым тыдні. Паводле AFP, 5 лістапада стала трэцім днём такіх інцыдэнтаў. Паходжаньне пагрозаў і магчымую сувязь паміж імі пакуль не ўстанавілі. Пацьверджаньняў, што за паведамленьнямі стаіць нейкая дзяржава або арганізацыя, няма.
