Амбасада Чэхіі ў Менску з 10 лістапада 2026 году пачне прымаць электронныя заяўкі на запіс для падачы дакумэнтаў на кароткатэрміновыя шэнгенскія візы ад беларусаў, якія хочуць наведаць блізкіх сваякоў у Чэхіі. Пра гэта паведамляецца ў афіцыйнай інструкцыі дыпляматычнага прадстаўніцтва, апублікаванай 4 лістапада.
Новы парадак тычыцца дзяцей, унукаў, бацькоў, бабуляў і дзядуляў грамадзян Чэхіі, а таксама беларусаў, якія законна жывуць у гэтай краіне на падставе дзейнай доўгатэрміновай візы, дазволу на доўгатэрміновае або сталае пражываньне.
Браты, сёстры, цёткі, дзядзькі і стрыечныя сваякі ў гэтую катэгорыю не ўваходзяць.
Каб запісацца, трэба з 10 лістапада накіраваць ліст на Minsk.Visa@mzv.gov.cz. У ім неабходна пазначыць імя і прозьвішча запрашальнага і заяўніка лацінскімі літарамі, тып і мэту візы, кантактныя зьвесткі заяўніка і нумар пашпарта.
Да ліста трэба далучыць копію старонкі пашпарта з фотаздымкам, дакумэнт аб мэце паездкі, пацьверджаньне сваяцтва і дакумэнты запрашальнага чалавека. Для сваякоў грамадзян Чэхіі патрабуецца копія чэскага пасьведчаньня асобы або пашпарта з датай, подпісам і згодай на выкарыстаньне копіі. Для сваякоў беларусаў неабходныя копіі дакумэнтаў аб праве пражываньня ў Чэхіі і пашпарта запрашальнага.
Дакумэнты прымаюцца ў фарматах PDF або JPG. На кожнага заяўніка трэба адпраўляць асобны ліст. Амбасада паведаміць дату і час прыёму ў адказным паведамленьні.
Падставай для зьменаў стала папраўка да чэскай урадавай пастановы № 55/2024, ухваленая 5 кастрычніка. Адкрыцьцё запісу не азначае аўтаматычнага атрыманьня візы: рашэньне па заяве прымаецца асобна.
