Кіраўніцтва Цэнтральнай выбарчай камісіі Ізраілю 1 лістапада заявіла, што парлямэнцкія выбары прайшлі належным чынам, а іх вынікі адлюстроўваюць волю выбарнікаў. Заява прагучала на фоне расьсьледаваньня падазрэньняў у падкупе выбарнікаў і замежным умяшаньні, а таксама спробаў прэм’ер-міністра Біньяміна Нэтаньягу паставіць пад сумнеў легітымнасьць галасаваньня.
Паводле Associated Press і The Times of Israel, старшыня выбарчай камісіі, судзьдзя Вярхоўнага суду Ноам Сольбэрг выступіў у супольным відэазвароце з кіраўніком службы ўнутранай бясьпекі «Шын Бэт» Давідам Зіні, выконваючым абавязкі кіраўніка камісіі Дынам Ліўнэ і генэральнай пракуроркай Галі Бахараў-Міярай. Сольбэрг заявіў, што большасьць паведамленьняў пра парушэньні выбарчага працэсу не адпавядае рэчаіснасьці.
Партыя Нэтаньягу «Лікуд» раней абвінаваціла партыі з пераважна арабскім электаратам у крадзяжы выбараў, не прадставіўшы пераканаўчых доказаў маштабных фальсыфікацыяў. Служба «Шын Бэт» расьсьледуе асобныя падазрэньні, але падкрэсьлівае, што гэта не азначае абвінавачаньня ўсёй арабскай супольнасьці.
Паводле падліку галасоў, блёк Нэтаньягу атрымаў 53 са 120 месцаў у Кнэсэце, блёк Гадзі Айзэнкота — 48, арабскія партыі — 19. Для парлямэнцкай большасьці неабходны 61 мандат.
Выбарчая камісія плянуе прадставіць вынікі прэзыдэнту Іцхаку Герцагу 4 лістапада. Пасьля кансультацыяў з партыямі ён павінен вызначыць, каму даручыць фармаваньне ўраду. Камісія дапускае нязначныя тэхнічныя выпраўленьні вынікаў у межах звычайнай праверкі.
«Варта» ужо паведамляла пра завяршэньне падліку галасоў і разьмеркаваньне мандатаў. Новая заява выбарчых органаў датычыцца законнасьці галасаваньня і наступстваў расьсьледаваньня.
