Уначы і раніцай 3 лістапада расейскія войскі нанесьлі масаваныя ўдары па энэргетычнай інфраструктуры Ўкраіны. Тры цеплавыя электрастанцыі кампаніі ДТЭК спынілі вытворчасьць электраэнэргіі праз сур’ёзныя пашкоджаньні абсталяваньня.
Пра гэта паведаміла кампанія ДТЭК. Паводле яе, па трох электрастанцыях былі выпушчаныя дзясяткі ракет і бесьпілётнікаў. Атака адбывалася некалькімі хвалямі. Дакладнае месцазнаходжаньне пашкоджаных станцыяў кампанія не раскрывае з меркаваньняў бясьпекі.
Паводле папярэдняй інфармацыі ДТЭК, супрацоўнікі станцыяў не пацярпелі. Кампанія плянуе пачаць аднаўленьне абсталяваньня, калі гэта дазволіць сытуацыя зь бясьпекай. Працы будуць каардынавацца з нацыянальным апэратарам электрасетак «Укрэнэрга».
Прэзыдэнт Украіны Ўладзімер Зяленскі паведаміў, што падчас начной атакі Расея выкарыстала 289 бесьпілётнікаў, 17 балістычных і 59 крылатых ракет. Паводле Reuters, удары закранулі электрастанцыі і падстанцыі ў розных частках краіны, ад Адэсы да Ровенскай вобласьці.
Пашкоджаньні энэргетычнай інфраструктуры прывялі да аварыйных адключэньняў электрычнасьці ў Кіеве і сама меней шасьці абласьцях Украіны, паведамляе Reuters са спасылкай на ўкраінскіх чыноўнікаў. Поўны маштаб пашкоджаньняў і тэрміны аднаўленьня электразабесьпячэньня пакуль невядомыя.
Расейскае Міністэрства абароны заявіла пра правядзеньне масаванага ўдару па ўкраінскіх энэргетычных аб’ектах. Ведамства сьцьвярджае, што мэтамі былі аб’екты, якія забясьпечваюць электраэнэргіяй вайсковую прамысловасьць і войскі Ўкраіны. Незалежнага пацьверджаньня гэтага тлумачэньня выбару цэляў няма.
