Фэдэральнае бюро расьсьледаваньняў ЗША прапанавала ўзнагароду да 20 тысяч даляраў за інфармацыю, якая дапаможа знайсьці чалавека, падазраванага ў нападзе з запальнай прыладай на будынак іміграцыйных службаў у Атланце, штат Джорджыя.
Напад адбыўся ўвечары 20 кастрычніка. Паводле ФБР, каля 20:14 мужчына кінуў у будынак прыладу, падобную да кактэйлю Молатава. Яна нанесла нязначныя пашкоджаньні. Паведамленьняў пра пацярпелых няма.
У будынку разьмяшчаюцца падразьдзяленьні Іміграцыйнай і мытнай паліцыі ЗША (ICE) і іміграцыйны суд.
21 кастрычніка супрацоўнікі ФБР працягвалі зьбіраць доказы і шукаць падазраванага. На момант паведамленьня затрыманьняў не было. У ведамстве заявілі, што вядомай пагрозы для грамадзкай бясьпекі цяпер няма.
Расьсьледаваньне вядзецца як спроба падпалу. Матыў нападніка пакуль не ўстаноўлены.
ФБР просіць людзей, якія маюць інфармацыю пра інцыдэнт або асобу падазраванага, паведамляць яе праз афіцыйны сайт tips.fbi.gov або па тэлефоне 1-800-CALL-FBI. Паводле абвешчаных умоваў, узнагарода можа дасягаць 20 тысяч даляраў.
