Сэнатар ЗША ад штату Канэктыкут Крыс Мэрфі перанёс інсульт 31 кастрычніка і быў шпіталізаваны. Пра гэта 1 лістапада афіцыйна паведаміла кіраўніца ягонага апарату Элісан Гэрвіт.
Паводле заявы, 53-гадовы сэнатар адчуў зьняменьне рукі, калі прысутнічаў на хакейным матчы сына. Яго даставілі ў мясцовую лякарню, дзе лекары дыягнаставалі інсульт. Пазьней Мэрфі перавялі ў шпіталь Джонза Гопкінза ў Балтымары для далейшага назіраньня.
Апарат сэнатара паведаміў, што ён знаходзіцца ў сьвядомасьці, рэагуе на лячэньне, а лекары задаволеныя ягоным станам. Кіраўніца апарату выказала спадзяваньне на поўнае выздараўленьне. Тэрміны вяртаньня Мэрфі да працы не названыя.
Крыс Мэрфі прадстаўляе Дэмакратычную партыю. Ён быў абраны ў Палату прадстаўнікоў у 2006 годзе, а ў Сэнат у 2012-м. Сэнатар уваходзіць у камітэт па асігнаваньнях і ўдзельнічае ў распрацоўцы фэдэральнай палітыкі ў пытаньнях іміграцыі і кантролю над зброяй.
На выбарах 3 лістапада ягонае месца ў Сэнаце не пераабіраецца.
