Кампанія Instacart, якая займаецца дастаўкай прадуктаў, пагадзілася на ўрэгуляваньне спрэчкі з амэрыканскімі ўладамі на 5 мільёнаў даляраў. Міністэрства юстыцыі ЗША і Камісія па роўных магчымасьцях працаўладкаваньня абвясьцілі пра пагадненьне 20 кастрычніка.
Паводле ведамстваў, кампанія стварала дадатковыя перашкоды для амэрыканскіх суіскальнікаў, калі падбірала супрацоўнікаў праз праграму працоўнай сэртыфікацыі PERM. Гэтая працэдура выкарыстоўваецца працадаўцамі, якія хочуць спансараваць замежных работнікаў для атрыманьня сталага жыхарства ў ЗША.
На пасады ў межах такой працэдуры заяўкі патрабавалі дасылаць звычайнай поштай. У той жа час пры стандартным найманьні Instacart дазваляла электронную падачу. Улады заявілі, што з прычыны гэтага частку амэрыканскіх кандыдатаў своечасова не разгледзелі.
Паводле пагадненьня, да 4 мільёнаў даляраў накіруюць у фонд кампэнсацыяў людзям, якія падавалі заяўкі або адмовіліся ад падачы праз такія ўмовы ў пэрыяд са сьнежня 2023-га да лютага 2026 году. Яшчэ 1 мільён даляраў кампанія выплаціць дзяржаве як грамадзянска-прававы штраф.
Людзі, якія мяркуюць, што пацярпелі, могуць паведаміць пра гэта на Instacart@eeoc.gov. Канчатковую адпаведнасьць умовам кампэнсацыі вызначыць адміністратар фонду.
Instacart заявіла Associated Press, што лічыць свае практыкі найманьня законнымі, але пагадзілася на ўрэгуляваньне, каб засяродзіцца на сваёй дзейнасьці. Кампанія таксама павінна публічна разьмяшчаць адпаведныя вакансіі і прымаць электронныя заяўкі.
