Камісія аховы здароўя і сацыяльных службаў Тэхасу (HHSC) прапанавала цалкам спыніць фінансаваньне дзяржаўнай праграмы дапамогі дзецям з аўтызмам на 2028–2029 фінансавыя гады. Пра гэта 12 кастрычніка паведаміла The Texas Tribune, якая вывучыла бюджэтную заяўку ведамства.
Children’s Autism Program дапамагае сем’ям аплочваць паводзінную тэрапію для дзяцей з аўтызмам. Кошт паслуг залежыць ад даходаў сям’і і страхаваньня, а некаторыя сем’і атрымліваюць дапамогу бясплатна. Праграма працуе з 2008 году праз 16 арганізацыяў-пастаўшчыкоў паслуг у розных частках штату.
Паводле The Texas Tribune, у 2026 фінансавым годзе праграма фінансавала тэрапію для 583 дзяцей. Яшчэ сама меней тысяча дзяцей чакала сваёй чаргі. За два папярэднія гады штат выдаткаваў на праграму $13,7 млн.
Прапанова зьявілася пасьля таго, як у ліпені губэрнатар Грэг Эбат, віцэ-губэрнатар Дэн Патрык і сьпікер Палаты прадстаўнікоў Дастын Бэраўз запатрабавалі ад дзяржаўных ведамстваў падрыхтаваць бюджэты са скарачэньнем выдаткаў на 3%.
HHSC афіцыйна падала бюджэтную заяўку на 2028–2029 гады ў верасьні. Яна прызначаная для разгляду заканадаўцамі на сэсіі, якая пачнецца ў студзені 2027 году. Скасаваньне праграмы пакуль не зацьверджанае.
Калі заканадаўцы падтрымаюць прапанову, дзейнае фінансаваньне паслуг захаваецца да канца жніўня 2027 году. Пасьля гэтага сем’ям давядзецца шукаць іншыя магчымасьці аплаты тэрапіі.
Асабліва складаная сытуацыя можа скласьціся ў Х’юстане. Кіраўніца Цэнтру аўтызму і парушэньняў разьвіцьця пры Ўнівэрсытэце Х’юстану ў Клір-Лэйку Даратэя Лерман паведаміла The Texas Tribune, што летась зьвязанымі з праграмай паслугамі цэнтру скарысталася 41 сям’я, а яшчэ каля 200 чакалі дапамогі. Паводле яе, цэнтар пакуль ня мае магчымасьці прымаць аплату праз Medicaid або страхавыя кампаніі.
Прадстаўнікі арганізацыяў абароны правоў людзей з інваліднасьцю папярэджваюць, што наяўнасьць страхавога пакрыцьця сама па сабе не гарантуе доступу да тэрапіі: некаторыя спэцыялісты не прымаюць пацыентаў Medicaid, а ў асобных рэгіёнах не хапае пастаўшчыкоў паслуг.
