Каардынацыйная Рада 6 кастрычніка а 19:00 правядзе адкрытыя анлайн-слуханьні пра сьмяротнае пакараньне ў Беларусі. Імпрэза пройдзе ў межах агульнага паседжаньня КР, трансляцыя будзе на яе YouTube-канале.
У якасьці экспэртаў запрошаныя Андрэй Палуда, каардынатар кампаніі «Праваабаронцы супраць сьмяротнага пакараньня ў Беларусі», і праваабаронца «Вясны» Валянцін Стэфановіч. Паводле паведамленьня КР, вынікам слуханьняў можа стаць рэзалюцыя супраць сьмяротнага пакараньня, калі яе падтрымаюць дэлегаты.
Слуханьні ўваходзяць у Тыдзень супраць сьмяротнага пакараньня 5–10 кастрычніка. «Вясна» таксама ўключыла іх у праграму Тыдня. Беларусь застаецца адзінай краінай Эўропы, дзе сьмяротнае пакараньне захоўваецца і ўжываецца.
