Беларуская праваабарончая супольнасьць 2 кастрычніка прызнала палітычнымі зьняволенымі яшчэ 12 чалавек. Паводле актуальнага сьпісу праваабаронцаў, цяпер такі статус маюць 888 чалавек.
У сумеснай заяве названыя Дзьмітры Рудакоў, Арцём Меркель, Анатоль Міндзіяраў, Максім Сямянчанка, Жанна Яскулд, Віталь Дзямідчык, Павал Бажко, Андрэй Аўсяньнікаў, Ільля Галыгін, Віталь Галавач, Яўген Дзяруноў і Андрэй Ціўкоў.
Праваабаронцы паведамілі, што справы зьвязаныя, сярод іншага, з абвінавачаньнямі ў дыфамацыі, удзеле ў пратэстах, узаемадзеяньні з прызнанымі ўладамі «экстрэмісцкімі фармаваньнямі» і рэалізацыяй свабоды выказваньня меркаваньняў. Ацэнка палітычнай матываванасьці зьяўляецца пазыцыяй арганізацый, якія падпісалі заяву.
