У Вугоршчыне 4 лістапада адкрылі публічны доступ да часткі архіваў дзяржаўнай бясьпекі камуністычнага пэрыяду. Новая электронная база ўтрымлівае зьвесткі прыкладна пра 55–60 тысяч чалавек, якія фігуравалі ў дакумэнтах спэцслужбаў.
Архіў дазваляе шукаць матэрыялы паводле імёнаў, даты і месца нараджэньня, а таксама апэратыўных псэўданімаў. Сярод апублікаваных дакумэнтаў ёсьць рэгістрацыйныя карткі агентаў, журналы вэрбаваньня і электронныя ўліковыя запісы.
Публікацыя стала магчымай пасьля прыняцьця закону пра адкрыцьцё дакумэнтаў органаў бясьпекі ранейшага рэжыму. Доступ арганізаваны праз спэцыяльную электронную плятформу.
Кіраўнік Гістарычнага архіву службаў дзяржаўнай бясьпекі Гергей Бэндэгуз Чех адзначыў, што архіўныя зьвесткі могуць быць няпоўнымі. Частка дакумэнтаў была зьнішчаная падчас паўстаньня 1956 году і зьмены рэжыму напрыканцы 1980-х гадоў.
Само знаходжаньне імя ў архіўнай базе не заўсёды пацьвярджае добраахвотнае супрацоўніцтва са спэцслужбамі. Частку людзей вэрбавалі пад пагрозамі або шляхам шантажу. Для дакумэнтаў пра трэціх асобаў прадугледжана выдаленьне часткі прыватных зьвестак.
Публікацыю прымеркавалі да 70-й гадавіны савецкага падаўленьня вугорскага паўстаньня. Дадатковыя архіўныя матэрыялы плянуецца адкрыць да лютага 2027 году.
