Уначы на 2 лістапада супэрмаркеты ў Швэцыі, Бэльгіі і Люксэмбургу паведамілі пра нечаканае павышэньне тэмпэратуры ў халадзільных і маразільных установах. Кампаніі і спэцыялісты вывучаюць магчымую кібэратаку на сыстэмы аддаленага кіраваньня абсталяваньнем.
У Швэцыі пра праблемы паведамілі сеткі Coop і ICA. Бэльгійская Delhaize пацьвердзіла тэхнічны інцыдэнт, які закрануў халадзільнае абсталяваньне дзясяткаў крамаў у Бэльгіі і Люксэмбургу.
Паводле Bloomberg, у Бэльгіі праблема закранула каля 40 крамаў Delhaize. У некаторых гандлёвых пунктах прыйшлося спыніць продаж прадуктаў, якія патрабуюць захоўваньня пры нізкай тэмпэратуры.
Падобныя інцыдэнты ў кастрычніку закранулі сотні супэрмаркетаў Францыі. Там зламыснікі атрымалі доступ да кантролераў халадзільнага абсталяваньня і зьмянялі налады тэмпэратуры, што прывяло да страты вялікіх аб’ёмаў прадуктаў.
Пакуль не ўстаноўлена, ці зьвязаныя новыя інцыдэнты з папярэдняй атакай у Францыі і хто за іх адказвае.
Выпадкі зьвярнулі ўвагу на небясьпеку для абсталяваньня, якім можна кіраваць праз інтэрнэт. Прадпрыемствы выкарыстоўваюць такое падключэньне для дыстанцыйнага абслугоўваньня, але кампрамэтацыя доступу дазваляе зьмяняць працоўныя налады бязь ведама пэрсаналу.
