Міністэрства замежных спраў Катару 1 лістапада асудзіла напад на газавоз Al Mayeda, які належыць катарскай кампаніі Nakilat, і паведаміла пра пачатак расьсьледаваньня абставінаў здарэньня.
Паводле паведамленьня Nakilat, увечары 30 кастрычніка падчас праходжаньня праз Пэрсыдзкую затоку ў судна, прызначанае для перавозкі звадкаванага прыроднага газу, трапілі невядомыя аб’екты.
Кампанія заявіла, што ніхто з членаў экіпажу не пацярпеў, шкоды навакольнаму асяродзьдзю няма, а судна застаецца ў бясьпечным стане і можа працягваць працу. Магчымыя наступствы інцыдэнту для судна яшчэ ацэньваюцца.
МЗС Катару назвала напад пагрозай бясьпецы марскога суднаходзтва і міжнародных паставак энэрганосьбітаў. У афіцыйнай заяве ведамства падкрэсьліла, што краіна пакідае за сабой права прымаць неабходныя захады для абароны сваіх суднаў, экіпажаў і маёмасьці ў адпаведнасьці зь міжнародным правам і Статутам ААН.
Паводле міністэрства, кампэтэнтныя органы пачалі расьсьледаваньне, каб высьветліць абставіны інцыдэнту і ўстанавіць адказных. Характар аб’ектаў, якія трапілі ў газавоз, і асобы нападнікаў пакуль не вызначаныя.
Здарэньне адбылося на фоне напружанасьці вакол Ірану і перамоваў аб аднаўленьні суднаходзтва праз Армузкую пратоку.
