Прэм’ер-міністар Бэльгіі Барт Дэ Вэвэр 2 лістапада падаў каралю Філіпу заяву аб адстаўцы пасьля няўдалых перамоваў паміж партыямі ўрадавай кааліцыі аб бюджэце на 2027 год. Каралеўскі палац пацьвердзіў падачу заявы, але манарх пакуль адклаў рашэньне аб яе прыняцьці.
Кароль плянуе з аўторка правесьці кансультацыі з кіраўнікамі парлямэнцкіх групаў, а ў пятніцу зноў сустрэцца з Дэ Вэвэрам.
Пяціпартыйны ўрад ня змог дамовіцца аб скарачэньні выдаткаў і дадатковых бюджэтных паступленьнях. Частка кааліцыі выступае за павелічэньне падаткаў для заможных плацельшчыкаў, іншыя партыі аддаюць перавагу скарачэньню дзяржаўных выдаткаў.
Дэ Вэвэр спрабаваў знайсьці каля 10 мільярдаў эўра бюджэтнай эканоміі або новых даходаў. Паводле прагнозу Эўракамісіі, дзяржаўная запазычанасьць Бэльгіі сёлета можа дасягнуць 110% валавога ўнутранага прадукту.
Высокія даўгавыя выплаты абмяжоўваюць фінансавыя магчымасьці краіны, у тым ліку ў пытаньні павелічэньня абаронных выдаткаў у межах абавязаньняў перад NATO.
Падача заявы яшчэ не азначае, што ўрад канчаткова пайшоў у адстаўку. Далейшы лёс кааліцыі залежыць ад рашэньня караля і вынікаў новых палітычных кансультацыяў.
