Фэдэральны судзьдзя Дэвід Картэр 28 кастрычніка адхіліў патрабаваньне Міністэрства юстыцыі ЗША асобна адкладаць і не ўключаць у падлік паштовыя бюлетэні прыкладна 20 тысяч зарэгістраваных выбарнікаў Каліфорніі. Адміністрацыя Дональда Трампа сьцьвярджае, што гэтыя людзі могуць ня мець амэрыканскага грамадзянства.
Рашэньне вынесена менш чым за тыдзень да прамежкавых выбараў у Кангрэс 3 лістапада. Судзьдзя прыйшоў да высновы, што прапанаванае фэдэральнае ўмяшаньне супярэчыць канстытуцыйнаму разьмеркаваньню паўнамоцтваў у правядзеньні выбараў і можа пазбавіць законных выбарнікаў магчымасьці рэалізаваць сваё права голасу. Ён таксама паставіў пад сумнеў надзейнасьць мэтаду, якім Мін’юст склаў сьпіс выбарнікаў.
Міністэрства юстыцыі дамагаецца праверкі грамадзянства выбарнікаў і настойвае, што незаконнае галасаваньне неабходна прадухіляць да падліку бюлетэняў. Каліфарнійскія ўлады запярэчылі супраць прапанаванага спосабу ўмяшаньня ў выбарчы працэс.
Гэта новае рашэньне акруговага суду. 26 кастрычніка Апэляцыйны суд дзявятай акругі ўжо адхіліў тэрміновае хадайніцтва Мін’юсту, але тады пытаньне разглядалася на іншай працэсуальнай стадыі, да рашэньня суду ніжэйшай інстанцыі.
Пра папярэдні этап «Варта» паведамляла 27 кастрычніка. Цяпер судзьдзя Картэр разгледзеў просьбу адміністрацыі аб неадкладных абмежаваньнях і адмовіў у іх. Паводле Los Angeles Times, прадстаўнік фэдэральнай пракуратуры Біл Эсэйлі паведаміў, што адміністрацыя ўжо падала паведамленьне аб апэляцыі і будзе дамагацца тэрміновага перагляду рашэньня.
