21 кастрычніка Расея вызваліла 74-гадовага грамадзяніна ЗША Стывэна Габарда, які правёў больш за чатыры гады ў зьняволеньні паводле абвінавачаньня ва ўдзеле ў вайне на баку Ўкраіны. Пра вызваленьне паведамілі амэрыканскія ўлады і спэцпасланьнік прэзыдэнта ЗША Стыў Ўіткаф.
Габард, былы выкладчык з Мічыгану, жыў ва Ўкраіне. Расейскія ўлады затрымалі яго ў 2022 годзе, а ў кастрычніку 2024-га Маскоўскі гарадзкі суд прысудзіў амаль да сямі гадоў пазбаўленьня волі за нібыта найміцтва. Сам Габард і ягоная абарона аспрэчвалі абвінавачаньні.
Раней Дзярждэпартамэнт ЗША прызнаў яго неправамерна затрыманым. Такі статус дазваляе амэрыканскаму ўраду выкарыстоўваць спэцыяльныя дыпляматычныя мэханізмы для вызваленьня сваіх грамадзянаў за мяжой.
Прэзыдэнт Дональд Трамп заявіў, што асабіста прасіў Уладзімера Пуціна вызваліць Габарда падчас тэлефоннай размовы на мінулым тыдні. Паводле Белага дому, ЗША не перадавалі Расеі іншых зьняволеных у абмен на яго вызваленьне.
Вызваленьне адбылося падчас візыту Ўіткафа ў Санкт-Пецярбург, дзе ён сустрэўся з Пуціным для абмеркаваньня амэрыканска-расейскіх адносінаў і магчымых перамоваў аб вайне ва Ўкраіне.
