Вярхоўны суд ЗША 19 кастрычніка адмовіўся разглядаць скаргу Халіда Шэйха Мухамэда і двух іншых абвінавачаных у арганізацыі тэрактаў 11 верасьня 2001 году. Яны дамагаліся аднаўленьня пагадненьняў з вайсковымі пракурорамі, якія дазвалялі ім прызнаць віну і атрымаць пажыцьцёвае зьняволеньне без права датэрміновага вызваленьня замест магчымага сьмяротнага пакараньня.
Паводле афіцыйнага рэестру Вярхоўнага суду, 19 кастрычніка ў справе № 26-13 было адхіленае хадайніцтва аб пераглядзе рашэньня ніжэйшага суду. Вярхоўны суд не разглядаў спрэчку па сутнасьці. Судзьдзя Брэт Кавано ня ўдзельнічаў у прыняцьці рашэньня.
Пагадненьні былі заключаныя ў 2024 годзе і ўхваленыя вайсковымі пракурорамі ды адказнай прадстаўніцай Пэнтагону ў справах вайсковых камісіяў. Аднак тагачасны міністар абароны Лойд Остын скасаваў іх, заявіўшы, што рашэньне аб магчымасьці сьмяротнага пакараньня ў такой справе павінна належаць кіраўніку Міністэрства абароны.
Адвакаты абвінавачаных аспрэчвалі паўнамоцтвы Остына скасоўваць ужо ўзгодненыя пагадненьні. Фэдэральны апэляцыйны суд стаў на бок ураду, прызнаўшы, што міністар дзейнічаў у межах сваіх паўнамоцтваў. Адмова Вярхоўнага суду пераглядаць справу пакідае гэтае рашэньне ў сіле.
Мухамэда абвінавачваюць у плянаваньні і кіраўніцтве тэрактамі, у якіх загінулі амаль тры тысячы чалавек. Разам зь ім пагадненьняў дамагаліся Мустафа аль-Хаўсаві і Валід бін Аташ. Судовы працэс заплянаваны на 2028 год. Абвінавачаныя яшчэ не прызнаныя вінаватымі, а сьмяротнае пакараньне застаецца магчымым вынікам разбору.
