Супэртайфун «Чампі» 18 кастрычніка прайшоў прыкладна за 16 кілямэтраў на поўдзень ад Гуаму, амэрыканскай тэрыторыі ў Ціхім акіяне. Прэзыдэнт Дональд Трамп ухваліў фэдэральную надзвычайную дэклярацыю, якая дазваляе прыцягваць рэсурсы для дапамогі насельніцтву.
Паводле Ўпраўленьня ўнутранай бясьпекі Гуаму, тайфун найбліжэй падышоў да вострава каля 4:26 раніцы паводле мясцовага часу. Асноўны ўдар прыпаў на паўднёвыя населеныя пункты. Улады папярэдзілі пра разбуральны вецер, небясьпечнае хваляваньне мора і магчымыя раптоўныя паводкі.
Па стане на 7:50 раніцы электразабесьпячэньне захоўвалася прыблізна на палове вострава. Раней электрычнасьць атрымлівалі каля 75% спажыўцоў. Гэта зьвесткі мясцовай энэргетычнай службы, апублікаваныя ўрадам Гуаму.
Амэрыканская Нацыянальная мэтэаралягічная служба пацьвердзіла, што «Чампі» рухаецца на захад ад Марыянскіх астравоў. Паводле абноўленага паведамленьня мясцовых уладаў, вецер хуткасьцю 40–50 міляў за гадзіну (64–80 км/г), з парывамі да 60 міляў за гадзіну (97 км/г), яшчэ можа захоўвацца.
Улады заклікалі жыхароў не выходзіць з надзейных будынкаў да афіцыйнага дазволу, не набліжацца да ўзьбярэжжа і пазьбягаць затопленых дарог. Надзвычайная дэклярацыя дазваляе Фэдэральнаму агенцтву па надзвычайных сытуацыях каардынаваць дапамогу і захады для абароны жыцьця, здароўя і маёмасьці.
