Менскі гарадзкі суд прызнаў бізнэсоўца Дзяніса Гуляшова вінаватым у «садзейнічаньні экстрэмісцкай дзейнасьці» паводле частак 1 і 2 артыкула 361-4 Крымінальнага кодэксу. Праваабарончы цэнтар «Вясна» пазначае від пакараньня як абмежаваньне волі без накіраваньня ў папраўчую ўстанову, так званую «хатнюю хімію».
Гуляшоў кіраваў групай кампаніяў «Дахміра», якая прадае абсталяваньне для жывёлагадоўчых гаспадарак. 25 верасьня МУС Беларусі ўключыла яго ў свой сьпіс асобаў, якіх улады лічаць датычнымі да «экстрэмісцкай дзейнасьці». Дакладны тэрмін абмежаваньня волі ў адкрытых крыніцах не названы.
