Краіны Эўразьвязу ўвечары 21 верасьня не далі канчатковага ўхваленьня пакетнай дамоўленасьці, якая прадугледжвала падаўжэньне на тры гады санкцыяў супраць расейскіх і беларускіх фізычных і юрыдычных асобаў, уведзеных у сувязі з вайной Расеі супраць Украіны. Reuters паведаміў са спасылкай на дыпляматаў, што перамовы працягнуцца раніцай 22 верасьня.
Паводле Reuters, прапанаваны кампраміс таксама прадугледжваў зьняцьце санкцыяў з расейскіх бізнэсоўцаў Алішэра Усманава і Міхаіла Фрыдмана. Латвія ў панядзелак не была гатовая ўхваліць пакет. Česká televize са спасылкай на ČTK таксама паведаміла, што краіны ЭЗ не пацьвердзілі раней анансаваную дамоўленасьць аб падаўжэньні санкцыяў.
Амбасадары 27 краін ЭЗ маюць аднавіць перамовы ў Брусэлі раніцай 22 верасьня. На момант апошняга абнаўленьня Reuters вынік заставаўся няпэўным.
