Аляксандар Лукашэнка 8 верасьня падпісаў указ, якім Дырэктыва № 1 «Аб мерах па ўмацаваньні грамадзкай бясьпекі і дысцыпліны» выкладзеная ў абноўленай рэдакцыі. Сярод прыярытэтных кірункаў дзяржаўных органаў цяпер асобна названа «супрацьдзеяньне экстрэмізму».
У дакумэнце таксама названыя ахова грамадзкага парадку, інфармацыйная бясьпека, кантроль зьнешніх міграцыйных працэсаў, супрацьдзеяньне незаконнаму абароту наркотыкаў, абарона насельніцтва і тэрыторыяў ад надзвычайных сытуацыяў і грамадзянская абарона, бясьпека дарожнага руху, экалягічная і санітарна-эпідэміялягічная бясьпека ды ахова працы.
«Позірк» зьвяртае ўвагу, што абвінавачаньні ў экстрэмізьме ў Беларусі выкарыстоўваюцца для перасьледу апанэнтаў уладаў. Human Rights Watch таксама дакумэнтуе сыстэмнае выкарыстаньне беларускімі ўладамі заканадаўства аб «экстрэмізьме» супраць іншадумства, апазыцыйных групаў, праваабаронцаў і незалежных мэдыя.
