4 верасьня вучні сотняў школ Каларада пакінулі заняткі дзеля пратэсту супраць ICE. Арганізатары казалі пра больш як 200 школ; у Дэнвэры сотні падлеткаў сабраліся ў La Alma-Lincoln Park.
Фармальна акцыю арганізавала вучнёўская Colorado Youth Coalition, якую сузаснавала 16-гадовая Брэ Кэнэдзі. Але вакол школьнікаў хутка зьявілася ўжо гатовая дарослая палітычная інфраструктура: 50501 Colorado, Brown Berets de Tepetlán, General Strike US і іншыя левыя групы.
І гэта ўжо не проста спрэчка пра паўнамоцтвы ICE. На маршы былі плякаты «ICE = Nazis», ICE параўноўвалі з KKK і Gestapo. У радыкальнай агітацыйнай рыторыцы вакол такіх акцыяў ЗША апісваюцца як «імпэрыя зла», а фэдэральныя агенты — як прыгнятальнікі і расісты.
General Strike US нават не хавае ідэалягічнага фундаменту: на сваім сайце рух называе капіталізм «карэннай прычынай» грамадзкіх праблемаў і патрабуе, сярод іншага, ліквідаваць ICE, абкласьці багатых падаткамі і будаваць новую сыстэму праз масавую мабілізацыю працоўнай клясы. Сярод ягоных партнэраў ёсьць Party for Socialism and Liberation, якая адкрыта патрабуе сацыялістычнай трансфармацыі грамадзтва.
Праблема ня ў тым, што падлеткі маюць палітычныя погляды. Праблема ў тым, як гэтыя погляды фармуюцца. Замест размовы пра закон, межы паўнамоцтваў ICE і розьніцу паміж дэпартацыяй і «выкраданьнем» школьніку прапануюць гатовы маральны набор: «нацысты», «Gestapo», «white supremacy», «прыгнятальнікі».
Так выглядае не крытычнае мысьленьне, а ягоная замена палітычнай этыкеткай.
Асобнае пытаньне — дарослыя ў школьным асяродзьдзі. CPR зафіксавала на мітынгу настаўнікаў, дарослых арганізатараў і супрацоўнікаў бясьпекі Denver Public Schools. Калі частка вучняў пачала штурхаць апанэнтаў і кідаць у іх бутэлькі, менавіта дарослым давялося іх стрымліваць. Denver Police паведаміла пра пяць нападаў або сутычак і трох дастаўленых у шпіталь.
Пры гэтым Denver Classroom Teachers Association яшчэ раней сама выкарыстоўвала anti-ICE рыторыку пра «Trump regime» і «terror and fear». Гэта не даказвае, што настаўнікі арганізавалі гэты walkout. Але паказвае, што палітычная рамка, у якой ICE падаецца не як спрэчная праваахоўная структура, а як маральнае зло, даўно прысутнічае і ў школьным асяродзьдзі.
Фінансаваньне такіх сетак заслугоўвае асобнага разбору. Але грошы тут другасныя. Галоўны рэсурс — галовы дзяцей.
Калі непаўналетніх замест навучаньня спрэчцы і фактам вучаць дзяліць сьвет на «прыгнятальнікаў» і «ахвяраў», гэта ўжо ня проста школьны пратэст. Гэта палітычная сацыялізацыя ў цалкам вызначанай радыкальна-левай традыцыі.