У Паўднёва-Кітайскім моры працягваюцца пошукі 17 чалавек пасьля крушэньня в’етнамскага грузавога судна Khoi Nguyen 18 каля рыфу Fiery Cross у архіпэлягу Спратлі. Паводле МЗС В’етнаму, на борце было 62 чалавекі, 45 ужо выратавалі.
Да пошукава-выратавальнай апэрацыі далучыліся в’етнамскія, кітайскія і філіпінскія службы, а таксама судны паблізу. Associated Press паведамляе, што філіпінская берагавая ахова накіравала патрульнае судна і самалёт пасьля запыту з боку В’етнаму.
Афіцыйны в’етнамскі бок кажа, што судна патанула ў дрэннае надвор’е. Інцыдэнт адбыўся ў раёне, дзе перакрыжоўваюцца тэрытарыяльныя прэтэнзіі некалькіх дзяржаваў, але на момант публікацыі гаворка ідзе пра выратавальную апэрацыю, а не пра ваенны інцыдэнт. Канчатковая прычына крушэньня і лёс зьніклых маракоў пакуль не ўстаноўленыя.
