Украінскія ўлады паведамілі, што расейскі балістычны ўдар па месцы правядзеньня абароннай імпрэзы ў Кіеўскай вобласьці забіў прынамсі 10 чалавек і параніў каля 100. Паводле Associated Press, удар прыйшоўся па пляцоўцы прыватнага вайсковага трэніровачнага аб’екту ў Бучанскім раёне.
Офіс генэральнага пракурора Ўкраіны адкрыў дзьве справы: пра магчымае парушэньне законаў і звычаяў вайны з боку Расеі і пра магчымую нядбайнасьць пры арганізацыі мерапрыемства. Сьледзтва павінна высьветліць, хто ўхваліў месца, час і фармат імпрэзы і ці былі дастатковыя меры бясьпекі.
The Kyiv Independent піша, што прадстаўнікі абароннай індустрыі былі на месцы, але арганізатары заяўляюць: дакладная лакацыя не была публічна раскрытая перад ударам. Частка дэталяў застаецца абмежаванай праз вайсковыя правілы публікацыі інфармацыі.
