Швайцарыя 4 лістапада прыняла рашэньне далучыцца да новых санкцыйных мераў Эўразьвязу супраць Беларусі. Зьмены ў санкцыйных сьпісах набылі моц 4 лістапада а 23:00 паводле швайцарскага часу, а сэктаральныя абмежаваньні пачалі дзейнічаць 5 лістапада.
Пра рашэньне паведаміла Фэдэральная рада Швайцарыі. Яно ўваходзіць у пакет захадаў, якімі Бэрн узгадняе сваю санкцыйную палітыку з 21-м пакетам абмежаваньняў ЭЗ супраць Расеі і зьвязанымі зь ім мерамі адносна Беларусі.
Эўразьвяз ухваліў дадатковыя беларускія абмежаваньні 23 ліпеня 2026 году, спасылаючыся на далейшае дачыненьне Беларусі да расейскай вайны супраць Украіны. Цяпер гэтыя меры ўводзіць і Швайцарыя.
Сярод раней ухваленых ЭЗ абмежаваньняў знаходзяцца санкцыі супраць Мазырскага нафтаперапрацоўчага заводу і Эўрапейскай трэйдынгавай кампаніі, зьвязанай са збытам беларускай нафтапрадукцыі. Таксама ЭЗ пашырыў абмежаваньні на пастаўкі тавараў і тэхналёгіяў для вайсковай, абароннай і авіякасьмічнай прамысловасьці, а таксама на асобныя фінансавыя апэрацыі і паслугі з крыптаактывамі.
Швайцарыя не ўваходзіць у Эўразьвяз, таму далучэньне да ягоных санкцыяў патрабуе асобных рашэньняў швайцарскіх уладаў. Цяперашняе рашэньне пашырае дзеяньне адпаведных абмежаваньняў на швайцарскую юрысдыкцыю.
Адначасова Бэрн увёў дадатковыя санкцыйныя меры супраць Расеі. Швайцарскія ўлады асобна апублікавалі абноўленыя сьпісы асобаў і арганізацыяў, на якія распаўсюджваюцца абмежаваньні.
