У Кіеве 3 лістапада праз пашкоджаньне энэргетычнай інфраструктуры ўзьніклі маштабныя перабоі з падачай вады і аварыйныя адключэньні электрычнасьці. Пра гэта паведамілі гарадзкія ўлады і камунальнае прадпрыемства «Кіеўводаканал».
Паводле водаканалу, расейскія ўдары абясточылі асноўныя аб’екты водазабесьпячэньня сталіцы. Прадпрыемства паведаміла, што аднаўляе працу разам з энэргетыкамі.
Нават пасьля вяртаньня электрычнасьці спатрэбіцца дадатковы час, каб запусьціць помпы, запоўніць сеткі і аднавіць нармальны ціск вады.
Мэр Кіева Віталь Клічко паведаміў, што пашкоджаньні аб’ектаў энэргетычнага вузла Кіеўскай вобласьці выклікалі аварыйныя адключэньні ў сталіцы і навакольным рэгіёне. Перабоі закранулі таксама працу электрычнага грамадзкага транспарту.
Паводле «Української правди», у найбольш пацярпелых раёнах пачалі разгортваць пункты абагрэву, дзе жыхары могуць сагрэцца і зарадзіць тэлефоны. Гарадзкі водаканал нагадаў пра сетку пунктаў выдачы пітной вады.
Нацыянальны апэратар электрасетак «Укрэнэрга» назваў апошні расейскі напад адным з найбуйнейшых сёлета. Пра поўнае аднаўленьне водазабесьпячэньня і электрычнасьці на момант гэтых паведамленьняў не абвяшчалася.
