Польшча ўзмацніла ахову паўночна-ўсходніх межаў пасьля папярэджаньняў спэцслужбаў пра магчымыя дывэрсіі і правакацыі ў першай палове лістапада. 3 лістапада прэм’ер-міністар Дональд Туск паведаміў пра падазроную актыўнасьць каля мяжы з расейскай Калінінградзкай вобласьцю ўначы.
Паводле Туска, памежнікі заўважылі людзей зь ліхтарамі неўзабаве пасьля поўначы. Польскія службы апэратыўна адрэагавалі. Прэм’ер заявіў, што магчымую правакацыю ўдалося прадухіліць, аднак прызнаў, што намер заўважаных людзей дакладна ўстанавіць немагчыма.
Раней польскія і саюзьніцкія выведныя службы папярэдзілі пра рызыку дывэрсіяў або больш сур’ёзных інцыдэнтаў, уключна з магчымым пранікненьнем узброеных людзей на польскую тэрыторыю. Генэрал Алексус Грынкевіч, галоўнакамандуючы аб’яднанымі сіламі NATO ў Эўропе, таксама папярэджваў пра падобныя рызыкі падчас візыту ў Варшаву.
У Вармінска-Мазурскім і Падляскім ваяводзтвах працуе ўзмоцненая групоўка паліцыі, вайскоўцаў, памежнай аховы і контратэрарыстычных падразьдзяленьняў. Іхныя дзеяньні каардынуе спэцыяльны штаб у Варшаве.
Паводле Польскага радыё, паліцэйскія падразьдзяленьні пераведзеныя ў стан павышанай гатоўнасьці на 2–8 лістапада. Меры ахопліваюць рэгіёны каля расейскай і беларускай межаў, хоць начны інцыдэнт адбыўся менавіта на польска-расейскім участку.
Варшава разглядае гэтыя захады як папераджальную апэрацыю. Пацьверджаньня таго, што заўважаныя людзі рыхтавалі дывэрсію або дзейнічалі па загадзе расейскіх службаў, пакуль няма.
