27 кастрычніка кампаніі OpenAI і Oracle абвясьцілі пра пашырэньне супрацоўніцтва: яны плянуюць аб’яднаць карпаратыўныя праграмы і даныя Oracle з ChatGPT, каб супрацоўнікі кампаніяў маглі карыстацца імі праз адзіны інтэрфэйс.
Цэнтральным элемэнтам праекту стане Oracle AI Workspace, працоўнае асяродзьдзе са штучным інтэлектам. Яго распрацоўваюць для доступу да фінансавых, закупачных і іншых бізнэс-праграмаў Oracle праз запыты звычайнай мовай.
Паводле OpenAI, доступ да карпаратыўных даных і дзеяньняў павінен падпарадкоўвацца дазволам і правілам бясьпекі кожнай арганізацыі. Гэта азначае, што інтэграцыя не павінна аўтаматычна адкрываць супрацоўніку інфармацыю, якой ён ня мае права карыстацца.
Кампаніі таксама прадставілі пляны новых інструмэнтаў для праверкі кібэрбясьпекі, стварэньня праграмаў і выкарыстаньня штучнага інтэлекту малым бізнэсам.
Oracle паведаміла, што супрацоўнікі яе кліентаў у ЗША змогуць набываць доступ да прадуктаў OpenAI праз плятформу Oracle Marketplace з выкарыстаньнем адпаведных карпаратыўных мэханізмаў аплаты.
Частка абвешчаных магчымасьцяў яшчэ знаходзіцца ў распрацоўцы. Кампаніі не паведамілі адзінай даты, калі ўсе інтэграцыі стануць даступнымі.
