Міністэрства юстыцыі ЗША 20 кастрычніка абвясьціла новую праграму грашовых узнагародаў за інфармацыю пра махлярства. Паводле ведамства, чалавек, чые зьвесткі прывядуць да прад’яўленьня крымінальных абвінавачаньняў у вызначаных катэгорыях справаў, можа атрымаць ад 10 000 да 30 000 даляраў.
Праграма называецца Fraud Whistleblower Incentive Program, скарочана WHIP. Яна прызначаная для людзей, якія паведамляюць пра магчымыя злачынствы ў фэдэральнай сыстэме аховы здароўя і махлярства з дзяржаўнымі праграмамі.
У пераліку ведамстваў, праграмы якіх ахоплівае ініцыятыва, названыя міністэрствы працы, адукацыі, аховы здароўя, жыльлёвага будаўніцтва, сельскай гаспадаркі, справаў вэтэранаў і іншыя органы.
Асаблівы прыярытэт у мэдычнай сфэры атрымаюць паведамленьні пра махлярства ў хатнім доглядзе, хосьпісах і некаторых спэцыялізаваных паслугах.
Паведаміць пра падазраванае махлярства можна праз афіцыйную старонку для паведамленьняў. Падрабязныя ўмовы праграмы апублікаваныя Міністэрствам юстыцыі.
Выплата не гарантаваная за кожнае паведамленьне. Паводле правілаў, рашэньне пра ўзнагароду прымае Міністэрства юстыцыі пасьля прад’яўленьня крымінальных абвінавачаньняў. Сама праграма дазваляе выплачваць грошы раней, чым завершыцца ўвесь крымінальны працэс.
