Міністэрства адукацыі Беларусі зацьвердзіла даты цэнтралізаванага тэставаньня на 2027 год. Пастанову № 172 ад 8 кастрычніка апублікавалі 17 кастрычніка на Нацыянальным прававым інтэрнэт-партале.
Тэставаньне па беларускай і расейскай мовах прызначанае на 31 траўня. Матэматыку, біялёгію, замежныя мовы і геаграфію можна будзе здаваць 27 траўня або 4 чэрвеня.
Для грамадазнаўства, хіміі, фізыкі і гісторыі Беларусі ў кантэксьце сусьветнай гісторыі вызначаныя 27 траўня і 7 чэрвеня.
Рэзэрвовыя дні для большасьці прадметаў — 19 і 21 чэрвеня. Для беларускай і расейскай моваў дадатковыя выпрабаваньні прызначаныя на 19 і 23 чэрвеня.
Усе іспыты пачынаюцца а 11:00 паводле менскага часу.
Паводле раней апублікаванай інфармацыі Міністэрства адукацыі, рэгістрацыя на асноўнае тэставаньне будзе праходзіць з 9 да 22 красавіка 2027 году. Для рэзэрвовых дзён вызначаны асобны пэрыяд рэгістрацыі з 8 да 11 чэрвеня.
Пастанова таксама вызначае пункты рэгістрацыі і месцы правядзеньня выпрабаваньняў. Абітурыентам варта загадзя ўдакладніць пералік прадметаў для выбраных спэцыяльнасьцяў і месцы здачы тэстаў.
