У Беларусі абнавілі склад камісіі, якая разглядае звароты грамадзянаў з-за мяжы наконт магчымых правапарушэньняў. Паводле апублікаванага 16 кастрычніка ўказу Лукашэнкі № 360 ад 14 кастрычніка, намесьнікам старшыні камісіі стаў намесьнік генэральнага пракурора Генадзь Дыська.
У склад таксама ўключылі старшыню Беларускай рэспубліканскай калегіі адвакатаў Віталя Дзямідовіча. З камісіі выключылі Аляксея Стука, Аляксея Швакава і Ўладзімера Басько. Ганна Канапацкая цяпер пазначаная ў складзе камісіі як Ганна Трухановіч.
Камісію па-ранейшаму ўзначальвае генэральны пракурор Дзьмітры Гара. Зьмены набылі моц пасьля афіцыйнага апублікаваньня ўказу.
Так званая камісія па вяртаньні створаная ў 2023 годзе. Яна разглядае звароты беларусаў, якія знаходзяцца за мяжой і хочуць вярнуцца, але асьцерагаюцца магчымай адказнасьці ў Беларусі ў сувязі з падзеямі пасьля 2020 году.
Цяперашні ўказ зьмяняе пэрсанальны склад камісіі. Ён сам па сабе не азначае амністыі, скасаваньня крымінальных справаў або гарантыі бясьпечнага вяртаньня для заяўнікаў.
