16 кастрычніка Міністэрства гандлю і Міністэрства навукі і тэхналёгіяў Кітаю апублікавалі праект новых экспартных абмежаваньняў на 40 тэхналёгіяў. Адначасова ўлады ўвялі часовае патрабаваньне рэгістраваць іх перадачу за мяжу яшчэ да канчатковага зацьвярджэньня пераліку.
Прапанова ахоплівае 23 тэхналёгіі штучнага інтэлекту, пяць біямэдычных і 12 тэхналёгіяў сонечнай энэргетыкі. Сярод іх вялікія моўныя мадэлі, аўтаномныя сыстэмы штучнага інтэлекту, вылічальныя комплексы і асобныя тэхналёгіі вытворчасьці сонечных панэляў.
Праект прадугледжвае забароны і абмежаваньні на экспарт асобных тэхналёгіяў. Грамадзкае абмеркаваньне працягнецца да 15 лістапада 2026 году.
Але часовае рэгістрацыйнае патрабаваньне дзейнічае ўжо з 16 кастрычніка. Яно датычыцца перадачы права ўласнасьці на адпаведныя тэхналёгіі замежным атрымальнікам, іх ліцэнзаваньня за мяжой і некаторых зьменаў замежнага кантролю над тэхналёгіямі. Рэгістраваць неабходна таксама асобныя экспартныя апэрацыі, якія ўжо пачаліся, але яшчэ не завершаныя.
Паводле афіцыйнага тлумачэньня, тэхналёгіі, ужо адкрыта апублікаваныя або перададзеныя ў адкрыты доступ, у асноўным выключаныя з прапанаванага кантролю. Кітайскія ўлады таксама прадугледжваюць спрошчаныя працэдуры для шэрагу міжнародных дасьледчых праектаў.
Новыя патрабаваньні могуць закрануць тэхналягічныя кампаніі, якія перадаюць кітайскія распрацоўкі партнэрам у ЗША і іншых краінах. Звычайнае выкарыстаньне сэрвісаў штучнага інтэлекту празь інтэрнэт само па сабе не азначае экспарту базавай тэхналёгіі.
