Жыхары акупаванага Расеяй гораду Алешкі ў Херсонскай вобласьці, якіх вывезьлі падчас часовага спыненьня агню, 31 кастрычніка перасеклі беларуска-ўкраінскую мяжу і дабраліся на падкантрольную Кіеву тэрыторыю. Пра завяршэньне гуманітарнай апэрацыі паведаміў прэзыдэнт Украіны Ўладзімер Зяленскі. Прыбыцьцё людзей таксама пацьвердзілі журналісты Associated Press, якія назіралі за сустрэчай эвакуаваных з роднымі.
Людзей вывезьлі з Алешак аўтобусамі праз акупаваныя тэрыторыі ў Расею, адкуль самалётамі даставілі ў беларускі Гомель. Раніцай 31 кастрычніка туды прыбылі чатыры самалёты з эвакуаванымі. Пасьля гэтага ўкраінскія грамадзяне працягнулі шлях да мяжы ў Чарнігаўскай вобласьці.
Зяленскі заявіў, што гуманітарная апэрацыя завершаная, а эвакуаваныя атрымаюць неабходную дапамогу. Паводле ўкраінскага ўпаўнаважанага ў правах чалавека Дзьмітра Лубінца, сярод вывезеных ёсьць 94-гадовая жанчына і дзіця ва ўзросьце крыху больш за год. Украінскія ўлады абмежавалі распаўсюд зьвестак пра дакладную колькасьць людзей, якія перасеклі мяжу, і месца пераходу з меркаваньняў бясьпекі.
Часовае спыненьне агню ў раёне Алешак пачалося 27 кастрычніка. Яно дазволіла размініраваць дарогі, даставіць у горад харчаваньне і лекі, а таксама арганізаваць вываз цывільных. У апэрацыі ўдзельнічалі прадстаўнікі Ўкраіны і Расеі. Паводле Белага дому і ўкраінскага кіраўніцтва, дамоўленасьці дасягнулі пры пасярэдніцтве першай лэдзі ЗША Мэланіі Трамп.
Лубінец паведаміў, што рэжым спыненьня агню павінен дзейнічаць да вечара 1 лістапада. Украінскія ўлады разьлічваюць захаваць гуманітарны доступ да Алешак і пасьля завяршэньня цяперашняй апэрацыі. Пра агульнае спыненьне вайны гаворкі няма: баявыя дзеяньні ў іншых раёнах працягваюцца.
