30 кастрычніка ў акупаваных Расеяй Алешках Херсонскай вобласьці пачаліся эвакуацыя цывільных жыхароў і раздача гуманітарнай дапамогі. Пра гэта паведаміў кіраўнік парлямэнцкай фракцыі «Слуга народу» Давід Арахамія. Украінскі ўпаўнаважаны ў правах чалавека Дзьмітро Лубінец таксама паведаміў пра прыбыцьцё ў горад.
Паводле Арахаміі, украінская дэлегацыя бясьпечна дабралася да Алешак, а мясцовае спыненьне агню працягвае дзейнічаць. Лубінец паведаміў, што размаўляе з жыхарамі, каб высьветліць іх патрэбы. Расейская ўпаўнаважаная ў правах чалавека Яна Лантратава таксама заявіла пра пачатак эвакуацыі. Паводле яе, жыхары могуць выбраць выезд на падкантрольную Ўкраіне або Расеі тэрыторыю.
Для гуманітарнай апэрацыі падрыхтавалі 25 аўтобусаў на 750 месцаў і машыны хуткай дапамогі для людзей з абмежаванай мабільнасьцю. Украінскі прэм’ер-міністар Сяргей Карэцкі спачатку назваў лічбу 527 чалавек, якія жадаюць выехаць на падкантрольную Ўкраіне тэрыторыю, але пазьней удакладніў, што колькасьць ахвотных пакуль невядомая. Колькі чалавек фактычна эвакуавалі, таксама не паведамлялася.
Мясцовае спыненьне агню дзейнічае з 27 кастрычніка і, паводле дамоўленасьці, павінна працягвацца да вечара 1 лістапада. Дамоўленасьці дасягнулі пры пасярэдніцтве першай лэдзі ЗША Мэланіі Трамп. Яна дазволіла арганізаваць гуманітарную апэрацыю ў горадзе, які застаецца пад расейскай акупацыяй.
Раней «Варта» паведамляла пра прыбыцьцё ўкраінскай дэлегацыі ў Гомель для падрыхтоўкі апэрацыі. Цяпер прадстаўнікі абодвух бакоў паведамілі пра пачатак эвакуацыі і выдачы дапамогі непасрэдна ў Алешках. Мясцовае перамір’е не азначае спыненьня баявых дзеяньняў на іншых участках фронту.
