21 кастрычніка Міністэрства фінансаў ЗША выключыла генэральнага дырэктара «Беларуськалію» Андрэя Рыбакова з санкцыйнага сьпісу SDN. Рашэньне апублікавала Ўправа кантролю за замежнымі актывамі (OFAC).
Зь сьпісу выдалілі тры запісы з рознымі варыянтамі напісаньня імя Рыбакова лацінкай. У афіцыйным дакумэнце пазначаны Андрэй Аляксеевіч Рыбакоў, які нарадзіўся 11 ліпеня 1976 году ў Магілёве. Прычыны зьняцьця абмежаваньняў амэрыканскае ведамства не назвала.
Рыбакоў знаходзіўся пад санкцыямі ЗША з 9 жніўня 2021 году. Тады ён узначальваў канцэрн «Белнафтахім». Амэрыканскія ўлады ўвялі супраць яго абмежаваньні на падставе ўказу № 13405, зьвязаўшы яго дзейнасьць з падсанкцыйным канцэрнам.
Кіраўніком «Беларуськалію» Рыбакоў стаў у лістападзе 2024 году. Гэта адно з асноўных прадпрыемстваў беларускай калійнай прамысловасьці, якая застаецца аб’ектам міжнародных санкцыяў.
Цяперашняе рашэньне азначае выключэньне канкрэтнай фізычнай асобы з амэрыканскага санкцыйнага сьпісу. Яно не адмяняе аўтаматычна санкцыі супраць самога прадпрыемства або іншых беларускіх арганізацыяў.
