Польская памежная служба зафіксавала восем спробаў незаконнага пераходу мяжы з боку Беларусі пасьля 34 дзён без такіх выпадкаў. Літоўскія памежнікі паведамілі пра дзьве спробы 20 кастрычніка, якія перапынілі 17-дзённы пэрыяд без аналягічных інцыдэнтаў.
Пра гэтыя зьмены 21 кастрычніка паведаміла агенцыя «Позірк», якая вядзе штодзённы маніторынг зьвестак памежных службаў краінаў Эўразьвязу.
Літоўская Служба аховы дзяржаўнай мяжы пацьвердзіла асобны інцыдэнт у раёне Друскенікаў. Два чалавекі спрабавалі прайсьці з тэрыторыі Беларусі праз водапрапускную трубу каля памежнай загароды. У іх былі мэталічныя нажніцы, якімі яны, як мяркуецца, зьбіраліся адкрыць браму.
Заўважыўшы перашкоду і пачуўшы набліжэньне памежнікаў, гэтыя людзі вярнуліся на беларускі бок. Пра затрыманьне ў гэтым інцыдэнце літоўская служба не паведамляла.
На мяжы Беларусі з Латвіяй 20 кастрычніка, паводле зьвестак памежных службаў, адзначаныя яшчэ 32 спробы незаконнага пераходу. «Позірк» падлічыў, што за першыя 20 дзён кастрычніка тры суседнія краіны ЭЗ агулам зарэгістравалі 630 такіх спробаў.
Паказьнікі адлюстроўваюць зарэгістраваныя спробы перасячэньня мяжы, а не колькасьць людзей, якія трапілі на тэрыторыю Эўразьвязу.
