Махмуд Халіль, былы студэнт Калюмбійскага ўнівэрсытэту і ўладальнік сталага віду на жыхарства ў ЗША, 19 кастрычніка зьвярнуўся ў Вярхоўны суд з просьбай перагледзець рашэньне апэляцыйнага суду, якое адкрывае магчымасьць ягонага паўторнага затрыманьня і дэпартацыі.
Халіль быў затрыманы ў сакавіку 2025 году пасьля ўдзелу ў прапалестынскіх студэнцкіх пратэстах. Адміністрацыя Дональда Трампа дамагаецца ягонай дэпартацыі, спасылаючыся на паўнамоцтвы ўладаў у сфэры іміграцыі і замежнай палітыкі. Адвакаты Халіля лічаць перасьлед парушэньнем канстытуцыйнай свабоды слова.
У чэрвені 2025 году фэдэральны судзьдзя распарадзіўся вызваліць Халіля з-пад варты. Аднак апэляцыйны суд трэцяй акругі пазьней пастанавіў, што раённы фэдэральны суд ня меў паўнамоцтваў разглядаць пытаньне законнасьці затрыманьня да завяршэньня прадугледжаных іміграцыйным заканадаўствам працэдураў.
Адвакаты просяць Вярхоўны суд перагледзець менавіта гэтае абмежаваньне судовага кантролю. На іхную думку, чалавек павінен мець магчымасьць зьвярнуцца ў фэдэральны суд, калі лічыць іміграцыйнае затрыманьне незаконным, нават пакуль асноўная справа аб дэпартацыі працягваецца.
Халіль застаецца на волі. Вярхоўны суд пакуль не вырашыў, ці прыме справу да разгляду. Новы зварот не зьмяняе аўтаматычна правілаў затрыманьня або дэпартацыі іншых імігрантаў.