Аляксандар Лукашэнка 19 кастрычніка падпісаў указ № 367 «Аб дзейнасьці Нацыянальнай акадэміі навук Беларусі». Дакумэнт прадугледжвае рэарганізацыю навуковых установаў, пераразьмеркаваньне кіраўнічых паўнамоцтваў і новыя патрабаваньні да кандыдатаў у акадэмікі.
Паводле афіцыйнага паведамленьня, шэраг навуковых установаў і навукова-практычных цэнтраў НАН будзе ліквідаваны, рэарганізаваны або пераўтвораны. Улады тлумачаць гэта неабходнасьцю пазбавіцца ад дубляваньня функцыяў і засяродзіць рэсурсы на прыкладных дасьледаваньнях. Канкрэтны поўны пералік установаў у паведамленьні не прыведзены.
Указ зацьвярджае новую рэдакцыю статуту НАН. Старшыня прэзыдыюму Акадэміі, яго намесьнікі і галоўны вучоны сакратар атрымаюць статус дзяржаўных грамадзянскіх службоўцаў. Старшыня зможа прызначаць і вызваляць ад пасадаў кіраўнікоў падпарадкаваных арганізацыяў, іх намесьнікаў і вучоных сакратароў.
Для абраньня акадэмікам уводзіцца ўзроставая мяжа ў 70 гадоў на момант вылучэньня, а членам-карэспандэнтам — 60 гадоў. Сярод патрабаваньняў таксама навуковая ступень доктара навук, званьне прафэсара і адпаведныя навуковыя дасягненьні.
Лукашэнка атрымае права асобным указам прысвойваць акадэмічныя званьні людзям, якія, паводле ўладаў, зрабілі значны ўнёсак у эканоміку і навуку.
Такім чынам, частка кадравых рашэньняў пераходзіць да старшыні прэзыдыюму, а ўлада Лукашэнкі ў пытаньнях прысваеньня акадэмічных званьняў пашыраецца. Афіцыйнае паведамленьне не называе колькасьці супрацоўнікаў, якіх можа закрануць рэарганізацыя.
