11 кастрычніка ў Беларусі адкрыліся два вайсковыя вучэньні Арганізацыі Дамовы аб калектыўнай бясьпецы (АДКБ): «Непарушнае братэрства — 2026» і «Бар’ер — 2026». Паводле АДКБ, у іх задзейнічаныя больш за 1500 вайскоўцаў і звыш 300 адзінак узбраеньня і тэхнікі, у тым ліку каля 80 бесьпілётнікаў.
Цырымонія адкрыцьця прайшла на плошчы Перамогі ў Віцебску. У вучэньнях удзельнічаюць прадстаўнікі Беларусі, Расеі, Казахстану, Кыргызстану і Таджыкістану. Акрамя вайсковых падразьдзяленьняў, прыцягнутыя супрацоўнікі органаў унутраных справаў, паліцыі і нацыянальнай гвардыі.
На палігоне «Лосвіда» ўдзельнікі «Непарушнага братэрства» адпрацоўваюць падрыхтоўку і правядзеньне міратворчай апэрацыі. На Старадорожскім палігоне ў межах вучэньня «Бар’ер» прадугледжаная адпрацоўка дзеяньняў па ліквідацыі крыніцаў біялягічных пагрозаў і мэдычным забесьпячэньні.
Асноўны этап вучэньняў заплянаваны на 12–16 кастрычніка. Паводле АДКБ, аснову расейскага вайсковага кантынгенту складаюць падразьдзяленьні агульнавайсковай арміі Цэнтральнай вайсковай акругі.
Колькасьць удзельнікаў, тэхнікі і бесьпілётнікаў названая арганізатарамі вучэньняў. Незалежнага пацьверджаньня гэтых лічбаў няма.
