Міністэрства замежных справаў Украіны адхіліла абвінавачаньні беларускіх уладаў у датычнасьці да ўдару дрона па грузавіку зь беларускай рэгістрацыяй у Бранскай вобласьці Расеі. Кіеў заявіў, што Менск не прадставіў пераканаўчых доказаў украінскай адказнасьці за інцыдэнт.
9 кастрычніка МЗС Беларусі выклікала часовага паверанага ў справах Украіны Івана Навіцкага і ўручыла яму ноту пратэсту. Беларускі бок сьцьвярджае, што 8 кастрычніка дрон атакаваў грузавік, у выніку чаго грамадзянка Беларусі атрымала цяжкія траўмы.
Паводле беларускага МЗС, рэгістрацыя аўтамабіля была выразна бачная, таму ведамства лічыць напад наўмысным. Менск папярэдзіў украінскі бок пра адказнасьць за магчымыя наступствы і заявіў, што пакідае за сабой права на меры ў адказ.
Украінскае МЗС назвала гэтыя абвінавачаньні беспадстаўнымі без апублікаваньня пераканаўчых доказаў. Кіеў таксама адхіліў заявы пра нібыта намер Украіны ўцягнуць Беларусь у вайну і заклікаў беларускія ўлады ўстрымацца ад пагрозаў і інфармацыйных маніпуляцыяў.
Сам факт атакі, абставіны яе правядзеньня і адказнасьць за яе не атрымалі незалежнага пацьверджаньня, якое дазваляла б вызначыць вінаваты бок. Публічныя заявы двух міністэрстваў застаюцца супярэчлівымі.
