Беларускую суіскальніцу прытулку Кацярыну Бартко, якая знаходзіцца ў іміграцыйным зьняволеньні ў Канзасе, перавялі ў шпіталь у Канзас-Сіці.
Паводле аўтарытэтных крыніцаў «Варты», 13 верасьня Бартко была пераведзеная ў шпіталь паводле распараджэньня лекара.
ICE не раскрывае назву і месцазнаходжаньне шпіталя, спасылаючыся на меркаваньні апэрацыйнай бясьпекі.
Паводле крыніцаў «Варты», прадстаўнікі Бартко не былі загадзя праінфармаваныя пра перавод і даведаліся пра яго ўжо пасьля таго, як пачалі высьвятляць, дзе яна знаходзіцца. Цяпер яны патрабуюць інфармацыю пра яе стан.
Шпіталізацыя адбылася на фоне працяглых праблем з мэдычнай дапамогай Бартко падчас знаходжаньня пад вартай ICE.
Паводле ўнутраных крыніцаў «Варты», падчас знаходжаньня ў іміграцыйным зьняволеньні Бартко пазбаўлялі жыцьцёва неабходных ёй лекаў.
Эндакрыноляг, які вывучаў яе мэдычныя паказчыкі, раней папярэджваў, што стан Бартко пагражае жыцьцю і патрабуе бесперапыннага лячэньня.
Што стала непасрэднай прычынай цяперашняй шпіталізацыі і ў якім стане Бартко знаходзіцца цяпер, пакуль невядома.
«Варта» працягвае атрымліваць інфармацыю пра разьвіцьцё сытуацыі.
«Варта» ўжо пісала пра праблемы з мэдычнай дапамогай Кацярыне Бартко ў іміграцыйным утрыманьні: папярэдні матэрыял.