Каардынацыйная рада пачала абмеркаваньне адразу двух праектаў, якія могуць істотна зьмяніць яе ўнутраную будову і адносіны зь іншымі структурамі беларускіх дэмакратычных сілаў. Адзін датычыць паўнамоцтваў КР адносна Аб’яднанага пераходнага кабінэту і Офісу Сьвятланы Ціханоўскай, другі — працы ўласнага Сакратарыяту Рады.
Абодва дакумэнты пакуль не прынятыя. Паводле абмеркаваньня на паседжаньні, дэлегатам даецца каля тыдня на працу з праектамі і папраўкамі перад наступнымі рашэньнямі.
Больш кантролю над Кабінэтам
Перамоўная пазыцыя па рэфармаваньні пратаколу ўзаемадзеяньня прапануе пашырыць стратэгічныя і кантрольныя паўнамоцтвы КР адносна Аб’яднанага пераходнага кабінэту. Сярод прапановаў — удзел Рады ў фармаваньні палітычнай часткі структуры Кабінэту, мэханізм кантролю за выкананьнем рашэньняў КР і магчымасьць выказваць вотум недаверу прадстаўнікам АПК.
Праект таксама прапануе выпрацаваць мэханізм разьвязаньня канфліктаў паміж КР, Кабінэтам і Офісам Ціханоўскай, стварыць працоўныя групы паміж профільнымі камісіямі і выканаўчымі структурамі, вызначыць квоты прамых прызначэньняў ад КР, а таксама мадэль вэта нацыянальнай лідаркі і спосаб яго пераадоленьня.
На паседжаньні гэта выклікала працяглую спрэчку. Прыхільнікі рэформы настойвалі, што выбарны прадстаўнічы орган павінен мець рэальныя мэханізмы кантролю за выканаўчымі структурамі. Крытыкі адказвалі, што КР яшчэ не выкарыстала ўсе магчымасьці цяперашняга пратаколу і што пашырэньне кантролю павінна суправаджацца адказнасьцю за вынікі прызначэньняў і рашэньняў.
Сакратарыят хочуць выразна зрабіць службовай структурай
Другі праект — новае Палажэньне аб Сакратарыяце КР. Ён прапануе замацаваць, што Сакратарыят зьяўляецца пастаяннай структурнай адзінкай, якая забясьпечвае арганізацыйную, адміністрацыйную, інфармацыйную і фінансавую працу, але не прымае палітычных рашэньняў.
Праект уводзіць пасаду намесьніка кіраўніка Сакратарыяту, асобна прапісвае мэдыяслужбу, канфлікт інтарэсаў, права дэлегатаў на доступ да дакумэнтаў і парадак узаемадзеяньня са Спікерам і іншымі органамі КР.
Кіраўніка Сакратарыяту прапануецца выбіраць праз адкрыты конкурс. У праекце прадугледжаны мінімум 14 дзён для падачы дакумэнтаў, публічнае прадстаўленьне кандыдатаў і галасаваньне Агульнага пасяджэньня. Структуру, максымальную колькасьць супрацоўнікаў і штатны расклад прапануецца зацьвярджаць Нарадзе фракцыяў.
Падчас дыскусіі прагучалі і заўвагі, што асобныя нормы праекту могуць супярэчыць дзейнаму Статуту КР і павінны быць сынхранізаваныя з магчымымі папраўкамі да яго. Аўтары і ўдзельнікі абмеркаваньня пагадзіліся працягнуць працу над дакумэнтам цягам наступнага тыдня.
Калі абедзьве рэформы будуць прынятыя блізка да цяперашняй рэдакцыі, КР паспрабуе адначасова ўзмацніць свой палітычны ўплыў на выканаўчыя структуры дэмакратычных сілаў і жорстчэй падпарадкаваць уласны адміністрацыйны апарат прадстаўнічаму органу. Пакуль жа гэта толькі праекты, а канчатковая канструкцыя будзе залежаць ад паправак і галасаваньняў.
