24 жніўня ў Беларусі пачалася праверка баявой гатоўнасьці адной з артылерыйскіх брыгадаў цэнтральнага падпарадкаваньня. Дзяржаўны сакратар Савету бясьпекі Аляксандар Вальфовіч уручыў міністру абароны Віктару Хрэніну распараджэньне на выкананьне навучальна-баявых задач.
Паводле паведамленьня Мінабароны, якое цытуюць беларускія мэдыя, брыгаду маюць прывесьці ў гатоўнасьць да выкананьня задач, а асобныя падразьдзяленьні — адмабілізаваць і даўкамплектаваць да штатаў ваеннага часу.
Вальфовіч заявіў, што гэтым разам правяраюць усю вэртыкаль кіраваньня ад міністра абароны да асобнага падразьдзяленьня. Асаблівую ўвагу, паводле яго, нададуць сучасным спосабам агнявога паражэньня і кіраваньня з улікам досьведу войнаў ва Ўкраіне і Іране.
Ён таксама паведаміў, што ў найбліжэйшы час праверкі закрануць і іншыя структуры вайсковай арганізацыі дзяржавы. Пры гэтым сам Вальфовіч назваў цяперашнія мерапрыемствы плянавай падрыхтоўкай. Назва брыгады і маштаб прызыву з запасу публічна не названыя.
