Фэдэральныя пракуроры ЗША абвінавацілі 11 чалавек у шматгадовай схеме, якая, паводле абвінаваўчага заключэньня, арганізавала больш за 1 000 фіктыўных шлюбаў для атрыманьня іміграцыйнага статусу замежнікамі, пераважна грамадзянамі Кітаю.
Схема, паводле пракуратуры Паўднёвай акругі Нью-Ёрку, працавала прынамсі з 2016 году да ліпеня 2026-га. Арганізатары нібыта бралі з замежных кліентаў да $100 000, а грамадзянам ЗША плацілі да $30 000 за ўдзел у фіктыўным шлюбе. Рэкрутэры маглі атрымліваць да $5 000 за кожнага прыцягнутага амэрыканца.
Пракуроры сьцьвярджаюць, што ўдзельнікі сеткі арганізоўвалі цырымоніі, пастановачныя фотасэсіі, супольныя банкаўскія і камунальныя рахункі, падатковыя дэклярацыі і страхоўкі, каб стварыць для USCIS выгляд сапраўднага сямейнага жыцьця. Калі патрабавалася інтэрвію, пары нібыта вучылі, як хаваць сапраўдны характар адносінаў і даваць ілжывыя адказы іміграцыйным чыноўнікам.
Паводле Міністэрства юстыцыі, сетка дзейнічала ня толькі ў Нью-Ёрку, але і ў Канэктыкуце, Масачусэтсе, Пэнсыльваніі, Кентукі, Тэнэсі, Джорджыі, Флорыдзе, а таксама ў Кітаі і Вануату. Улады лічаць, што праз маштаб і працягласьць схемы яе арганізатары маглі атрымаць дзясяткі мільёнаў даляраў.
Кожнаму з 11 абвінавачаных інкрымінуюць змову з мэтай шлюбнага і іміграцыйнага махлярства, за якую максымальна пагражае да пяці гадоў зьняволеньня, а таксама змову з мэтай садзейнічаць незаконнаму пражываньню замежнікаў у ЗША, дзе максымальная санкцыя складае да 10 гадоў.
Іміграцыйны фрод сябе не апраўдвае нават тады, калі спачатку здаецца, што схема спрацавала. Калі будзе даказана, што грын-карта атрыманая праз фіктыўны шлюб або падман, выдадзены на гэтай падставе іміграцыйны статус, хутчэй за ўсё, будзе ануляваны. Калі чалавек пасьпеў на такой падставе натуралізавацца, Міністэрства юстыцыі можа дамагчыся пазбаўленьня амэрыканскага грамадзянства праз denaturalization.
Пасьля страты статусу або грамадзянства замежнік можа быць высланы з ЗША. Акрамя таго, fraud або наўмыснае ўвядзеньне іміграцыйных уладаў у зман стварае пажыцьцёвую падставу для inadmissibility паводле INA §212(a)(6)(C)(i). На практыцы гэта азначае, што чалавек можа праз шмат гадоў страціць грын-карту, грамадзянства і права вярнуцца ў ЗША. Закон ведае асобныя выключэньні і waiver-працэдуры, але будаваць іміграцыйную стратэгію на надзеі атрымаць такое выключэньне пасьля выкрыцьця фроду вельмі рызыкоўна.
USCIS таксама прама зыходзіць з таго, што статус пастаяннага жыхара, атрыманы праз fraud, ня лічыцца законна атрыманым для мэтаў натуралізацыі. Таму фіктыўны шлюб можа даць чалавеку дакумэнт на некалькі гадоў, але не надзейны статус: калі падман выявяць, наступствы могуць дагнаць яго значна пазьней.
Галоўная практычная выснова простая: іміграцыйны фрод можа абнуліць увесь шлях у ЗША нават праз гады пасьля атрыманьня дакумэнтаў. Грын-карта, а затым і грамадзянства не «адмываюць» першапачатковы падман.
Для звычайных іміграцыйных заяўнікаў гэтая справа не мяняе правілаў атрыманьня грын-карты праз сапраўдны шлюб. Але яна добра паказвае, чаму USCIS правярае, ці быў шлюб сапраўдным, і чаму спроба «абыграць сыстэму» можа скончыцца стратай статусу, грамадзянства і магчымасьці вярнуцца ў краіну.
Усе названыя ў справе асобы пакуль толькі абвінавачаныя і лічацца невінаватымі, пакуль іхная віна не будзе даказаная ў судзе.