Упраўленьне па кантролі за харчовымі прадуктамі і лекамі ЗША прапанавала новае правіла, паводле якога вытворцы мусяць паведамляць FDA перад выхадам на рынак новых харчовых інгрэдыентаў і дабавак, якія кампаніі самі лічаць «агульнапрызнана бясьпечнымі» (GRAS).
Цяпер вытворца можа самастойна зрабіць такую выснову і не паведамляць пра яе FDA. Паводле прапановы, кампанія павінна будзе падаць навуковае абгрунтаваньне бясьпекі, а FDA атрымае магчымасьць запатрабаваць дадатковыя зьвесткі або зьвярнуць увагу на патэнцыйную рызыку. На прапанову адведзены 120-дзённы пэрыяд грамадзкіх камэнтароў.
Гэта не азначае, што FDA будзе загадзя зацьвярджаць кожную новую дабаўку. Для абавязковай поўнай праверкі ўсіх такіх інгрэдыентаў агенцтву спатрэбіліся б дадатковыя паўнамоцтвы ад Кангрэсу. Для пакупніка галоўная зьмена ў тым, што дзяржава атрымае больш інфармацыі пра тое, якія новыя рэчывы трапляюць у прадукты.
