Фэдэральны суд акругі Канзас распачаў паскораны разгляд справы грамадзянкі Беларусі Кацярыны Бартко, якая знаходзіцца ў іміграцыйным утрыманьні і сьцьвярджае, што ня атрымлівае неабходнай мэдычнай дапамогі.
7 жніўня судзьдзя Джон Лангструм абавязаў прадстаўнікоў уладаў да 11 жніўня патлумачыць, чаму суд ня мусіць задаволіць яе пэтыцыю пра habeas corpus і хадайніцтва пра экстраныя меры. Суд асобна запатрабаваў інфармацыю пра цяперашняе лячэньне Бартко, доступ да спэцыялістаў, праблемы з выдачай мэдычных дакумэнтаў і магчымасьць яе вызваленьня на час іміграцыйнага працэсу.
Паводле матэрыялаў пэтыцыі, Бартко раней перанесла апэрацыю з прычыны раку шчытападобнай залозы і залежыць ад пастаяннай замяшчальнай тэрапіі. Яна сьцьвярджае, што пасьля трапленьня пад іміграцыйнае ўтрыманьне лячэньне неаднаразова перарывалася, а яе стан запатрабаваў некалькіх экстраных зваротаў у шпіталь. У справу таксама пададзена мэдычнае заключэньне, якое папярэджвае пра рызыку сур’ёзных ускладненьняў пры неналежнай тэрапіі.
Бартко просіць суд альбо забясьпечыць ёй бесперапыннае лячэньне і неабходныя кансультацыі, альбо разгледзець магчымасьць вызваленьня пад нагляд на час іміграцыйнага працэсу.
Суд пакуль не выносіў рашэньня па сутнасьці гэтых сьцьверджаньняў. Пазыцыю ICE і іншых адказчыкаў суд павінен атрымаць да 11 жніўня.