Адміністрацыя Дональда Трампа рыхтуе новыя правілы правядзеньня экзамэну для прэтэндэнтаў на амэрыканскае грамадзянства. Міністэрства ўнутранай бясьпекі хоча ўсталяваць больш выразныя стандарты праверкі ведаў і дазволіць USCIS у некаторых выпадках прыцягваць да тэставаньня староньнія арганізацыі.
Ініцыятыва атрымала назву «Абарона цэласнасьці працэсу натуралізацыі праз узмоцненыя адукацыйныя стандарты». Яна ўпершыню зьявілася ў фэдэральным пляне рэгулятарных дзеяньняў і пакуль знаходзіцца толькі на стадыі падрыхтоўкі праекту правілаў.
Гэта азначае, што ніякіх новых патрабаваньняў да заяўнікаў цяпер не ўведзена. Ад прэтэндэнтаў не патрабуюць дыплёмаў, школьных атэстатаў, абавязковых курсаў або дадатковых экзамэнаў.
Пад «адукацыйнымі патрабаваньнямі» амэрыканскае заканадаўства цяпер разумее здольнасьць чытаць, пісаць і размаўляць па-ангельску, а таксама веданьне гісторыі ЗША, асноў Канстытуцыі і дзяржаўнага ладу. DHS лічыць, што дзейныя нормы недастаткова дакладна вызначаюць, якім спосабам заяўнік павінен пацьвярджаць гэтыя веды.
Праект можа даць USCIS больш свабоды ў выбары фармату тэставаньня, у тым ліку магчымасьць перадаваць правядзеньне экзамэну вонкавым арганізацыям. Якія арганізацыі змогуць гэта рабіць, хто будзе іх ліцэнзаваць і як USCIS будзе кантраляваць вынікі, пакуль невядома.
Публікацыя праекту правілаў папярэдне заплянаваная на сьнежань 2026 году, але гэта арыенціровачная дата. Пасьля публікацыі ў Federal Register пачнецца грамадзкае абмеркаваньне. Толькі потым DHS зможа падрыхтаваць канчатковыя правілы і вызначыць дату іх набыцьця моцы.
Што рабіць цяпер: заяўнікам варта рыхтавацца паводле дзейных матэрыялаў USCIS і не плаціць за курсы або «новыя сэртыфікаты», якія нібыта ўжо сталі абавязковымі. Парадак можа зьмяніцца толькі пасьля афіцыйнай публікацыі і завяршэньня рэгулятарнай працэдуры.