30 ліпеня а 15:00 фэдэральны суд у Бостане разгледзіць, ці пакінуць у сіле часовую забарону на найбольш жорсткія наступствы нявыплаты штогадовага збору $100 за незавершаную заяву на прытулак.
Гэтая частка справы наўпрост датычыць беларусаў, чыя форма I-589 застаецца на разглядзе USCIS. Грамадзянства тут ня мае значэньня: збор распаўсюджваецца на ўсіх заяўнікаў, якія падпадаюць пад умовы Annual Asylum Fee.
Што дзейнічае цяпер
21 ліпеня судзьдзя Натаніэл Гортан часова забараніў USCIS:
- адхіляць заяву на прытулак толькі празь нявыплату штогадовага збору;
- спыняць зьвязаны з гэтай заявай дазвол на працу;
- пачынаць працэдуру выдаленьня толькі з прычыны нявыплаты збору.
USCIS пацьвердзіла, што выконвае судовую пастанову. Але суд не адмяніў сам збор і не дазволіў заяўнікам яго ігнараваць. Ведамства можа працягваць дасылаць паведамленьні і прымаць выплаты.
Каму трэба плаціць
Паводле USCIS, збор павінны плаціць людзі, чыя заява I-589 заставалася незавершанай увесь пэрыяд ад 1 кастрычніка 2024 да 30 верасьня 2025 году. Для заяваў, пададзеных пасьля 1 кастрычніка 2024 году, абавязак узьнікае пасьля 365 дзён разгляду і паўтараецца штогод, пакуль справа застаецца незавершанай.
Пры першай аплаце самому вылічваць дату ня трэба: USCIS павінна даслаць асабістае паведамленьне з сумай, тэрмінам і спосабам аплаты. USCIS цяпер указвае, што пасьля атрыманьня паведамленьня збор трэба заплаціць цягам 30 дзён. Fee waiver для гэтага збору не прадугледжаны.
Што рабіць беларусам
Калі паведамленьне USCIS ужо прыйшло, яго ня варта ігнараваць. Трэба праверыць A-Number, receipt number, тэрмін і пацьверджаньне аплаты ў асабістым кабінэце. Часовая судовая абарона стрымлівае санкцыі, але не скасоўвае абавязак заплаціць $100.
Калі паведамленьне не прыйшло, USCIS раіць не дасылаць выпадковы плацёж загадзя, а чакаць асабістай інструкцыі.
Галоўная няпэўнасьць цяпер у тым, ці працягне суд гэтую абарону пасьля слуханьня 30 ліпеня. ASAP паведамляе, што новую пастанову чакаюць не пазьней за 5 жніўня.