Падазраванага ў сьмяротным нападзе каля бэрлінскага Christopher Street Day, 21-гадовага Абдула Балута, застрэлілі ўвечары 26 ліпеня падчас паліцэйскай апэрацыі ў раёне Шпандаў. Яго шукалі амаль суткі пасьля атакі ў Тыргартэне, дзе загінула жанчына, а 29 чалавек атрымалі раненьні.
Напад адбыўся 25 ліпеня каля 22-й гадзіны. Белы арандаваны фургон заехаў на алею Ahornsteig у вялікім парку Тыргартэн, урэзаўся ў групу людзей і пасьля сутыкнуўся з дрэвам. Паводле нямецкіх уладаў, кіроўца затым пакінуў машыну і, імаверна, працягнуў атаку з халоднай зброяй. Міністар унутраных справаў Аляксандар Добрындт казаў пра мачэтэ. Частка параненых атрымала цяжкія траўмы.
Атака адбылася не на маршруце параду і не на пляцоўцы заключнай вечарыны, а за некалькі соцень мэтраў ад Брандэнбурскай брамы. У парку маглі знаходзіцца як удзельнікі прайду, так і звычайныя мінакі. Тым ня менш улады лічаць, што выбар месца і часу быў зьвязаны з Christopher Street Day, і разглядаюць напад як ісламісцкі тэрарыстычны акт.
Балут нарадзіўся і вырас у Бэрліне, меў нямецкае грамадзянства і ліванскія карані. Ён быў вядомы праваахоўным органам задоўга да нападу. У 2022 годзе суд прызнаў яго вінаватым у нанясеньні цялесных пашкоджаньняў і рабунковым вымагальніцтве ды прызначыў меры паводле ювэнальнага заканадаўства.
У 2025 годзе Балут паехаў у Лібан, плянуючы адтуль трапіць у Сырыю і далучыцца да тэрарыстычнай арганізацыі «Ісламская дзяржава». Паводле пракуратуры, у Лібане ён кантактаваў зь людзьмі, якіх лічыў удзельнікамі ІД. Ліванскія ўлады яго затрымалі, а вайсковы суд прысудзіў тры месяцы зьняволеньня, у тым ліку за распальваньне рэлігійнай і сэктанцкай варожасьці.
Пасьля адбыцьця пакараньня ён вярнуўся ў Нямеччыну і быў затрыманы ў бэрлінскім аэрапорце. У траўні 2026 году суд для непаўналетніх і маладых дарослых прызнаў яго вінаватым у падрыхтоўцы цяжкага акту гвалту, што пагражаў дзяржаўнай бясьпецы, распаўсюдзе прапаганды ІД у Instagram і іншых злачынствах. Ён атрымаў год і дзесяць месяцаў зьняволеньня ўмоўна.
Суд улічыў папярэдняе ўтрыманьне пад вартай у Лібане і Нямеччыне, прызнаньне віны і заявы Балута, што ён нібыта адышоў ад экстрэмісцкіх поглядаў. Рэальнай атакі ў той справе тады не адбылося. Пракуратура абскардзіла мяккі прысуд, але да разгляду апэляцыі Балут заставаўся на волі.
У нядзелю каля 18-й гадзіны паліцыя знайшла яго ў садовым пасёлку ў Шпандаве. Паводле афіцыйнай вэрсіі, Балут пабег на паліцыянтаў з вострым прадметам. Супрацоўнікі адкрылі агонь, зрабіўшы прынамсі адзін стрэл. Мэдыкі спрабавалі яго рэанімаваць, але ён памёр на месцы.
Сьмерць падазраванага завяршыла вышук, але не расьсьледаваньне. Сьледчыя працягваюць высьвятляць поўную храналёгію нападу, падрыхтоўку, магчымыя кантакты і тое, ці меў Балут саўдзельнікаў. Фэдэральная пракуратура Нямеччыны ўзяла справу пад свой кантроль.
