У Варшаве 8 жніўня адкрылася V канфэрэнцыя «Новая Беларусь» — двухдзённы форум дэмакратычных сілаў, грамадзкіх ініцыятываў і беларускай супольнасьці. Першы дзень пачаўся з выступу Сьвятланы Ціханоўскай, відэазвароту Івонкі Сурвілы і прамовы Алеся Бяляцкага.
У першай стратэгічнай панэлі ўдзельнічаюць Ціханоўская, Віктар Бабарыка, Павел Латушка, Павел Севярынец і спікер Каардынацыйнай Рады Арцём Брухан. Заяўленая тэма — як дэмакратычным сілам скарыстаць зьмены вакол Беларусі і перахапіць палітычную ініцыятыву.
Асобная дыскусія прысьвечаная беларуска-ўкраінскаму супрацоўніцтву. У праграме першага дня таксама ёсьць дэбаты пра адказнасьць удзельнікаў рэпрэсіяў, ролю беларускай мовы і мадэль бясьпекі краіны, а таксама панэль пра дэмакратычны транзыт і рэформы пасьля зьмены ўлады.
На сайце канфэрэнцыі апублікаваны пакет рэзалюцыяў. У палітычным дакумэнце дэмакратычныя сілы асуджаюць расейскую агрэсію супраць Украіны, заклікаюць не выконваць злачынных загадаў і называюць умовамі выхаду з крызісу спыненьне рэпрэсіяў, вызваленьне палітвязьняў, свабодныя выбары і ліквідацыю палітычнай ды вайсковай залежнасьці ад Расеі. Найбольш надзейным шляхам да гэтага ў дакумэнце названы агульнанацыянальны дыялёг у фармаце круглага стала з удзелам дэмакратычных сілаў і прадстаўнікоў рэжыму.
Другі дзень форуму 9 жніўня будзе прысьвечаны транснацыянальным рэпрэсіям, адукацыі і нацыянальнай ідэнтычнасьці, сацыяльнай падтрымцы беларусаў і працы незалежных мэдыя. Прадстаўленьне дакумэнтаў і рэзалюцыяў заплянаванае перад закрыцьцём канфэрэнцыі.
Раней «Варта» пісала пра паведамленьні праваабаронцаў, што беларускія сілавікі спрабавалі зьбіраць зьвесткі пра магчымых удзельнікаў форуму.
